Ch'lapan

 

Ein dimainche, o z'toémes avu d'boins amis ein route à rchini dains ch'courti à Bob et à Léa.

A ch't'heure, o savé d'quoé qui'n'n'est... Ches courtis d'chés tchoeurs-fallis qu'o sonnes éd'vénus, ch'n'est mie pus gramint conne dains ch'temps éd'nous layons : ponmétérre pour chés gins, bétrafes pour chés bêtes, oselle pour él'soupe, rhubarpe pour chés confiotes pis pour él'drisse, tchots poés pour chés lardons, kérottes pour aouér des biélles fesses, bref, un vrai courti avu ch'mont d'fien, chés cabanes à lapans, él tchote baraque pour éz'z'outils. Nan ! Ein hui nou gardin, conme éch'tilo éd'Bob et Léa, ch'est un carré d'gazon, des massifs d'hortensias ichi, quiques rosiers lo, des bieux tchots pommiis ein escalier conte chés murs.

A n'pus qu'maintchii éz'rypermartchis i sont fin bien bagués, achalindés. Pour chés gins qu'ont d'quoé, bé seur, point pour chés peufes miséres... Y o d'tout' ! Ed'chés pattes-à-tchul Olouéz à chés fruits étzotriques, d'chés boétes éd'pilchards àch'ju d'clés inglézes. Y o mie pus dzoin d'gardin pour matcher quint o treuve él térre troup basse et pis qu'o n'o dél chiatique plein sin dous. O préfère coére miux passer pis rapasser trinte-chix foés l'tondeuse qu'alle échouit tout ch'voésînache putout qué d'sé rinde pale à fouir toudi avu ch'louchet...

Ch'dimainche-lo, o pitchenitchouait don dains ch'gardin à Bob et Léa. Un solel conne on n'ein voét pu gramint ein hui qu'ein Picardie ; du chide, du boin vin (Saint-Emiyon quatre-vingt troés, o n’o d’qué régaler nou gargate) ou coére êd'ieu fréque pour chés gins qu'o l'pitchuite ; des bieux pichons su ch'barbéquiou ; du pan picard, du pan bis, du pan à noéx (0 z'avoez r'martchi qu'chés boins boulaingis i font des mervèlles à ch't'heure).

Ch'tchien Bèbert, un braque un molè drole, ch'tchien à Raymond, ch'cacheux d'avinture, avu s'boéne amie Sido, ch'tchien i connouait z'zagis, i varonne, i vo d'l'un à l'eute dains 1'espoér qu'o l'i baille ein chuque, des breuilles, un morcieu d'pan à noèx. Il infique s'brongne sous ch'coude éd'chés gins pis i leu soulève leu bros, d'un keup. Bèbert, ch'o n'n'est un d'rude... Des foès, i s'fouait rimbarrer, des foès o li fout einne baffe, mais sains s'foère vir, passe que ch’Rlaymond, rapport à sin tchien, il est rudmint suscektique, il o vite touait d'tourner sin nez.

Bébert i est in route à déchiner un os èd'cotrette ou à létcher emne écuélle. Pis lé vlo décanillé aït-aït à ch'bout d'éch couru, sin muzieu dains ch'l'hayure, à épaveuder chés grous merles maillards ou chés ochtcheus. O l'voét sin l'voèr, ch'tchien. Il est lo, il s'in vo. I s'acagnardit sous emne cailléle, i jue avu 'zéfants, i s'fout dains nous pattes. I s'foait appler Arthur quink i passe troup prés d'chés brézes. Il rsinpe àchés nazus. I sont lo pis i n'sont nie lo.

Vlo qu'd'un keup o voét ch'tchien Bébert avu quétkeuse éd'blanc dains s’guife. I s'êrdréche conne un cabite.

-  Qu’ouet’ ch'est qu'il o coêre prin ? qu'i s'ègaviote ch'Raymond.

Ch'tchien, i s'seint d'un keup moins fièr. I s'doute qu'il o fouait emne cacoule du diabe. Il avainche comme un péteux, s'tcheue inter ses pattes. I vo s'muchi derrière ch'cadou à Bob.

-  Nom dé zo ! qu'i s'ètoque ch'Raymond.

-  Quoè qu'i o ?

-  R'baie dains qué brein qu'i nous o mis, ch'bétal-lo !

-  Mon dju sangneur !

-  Ben quoé ? qu'a dit Léa derrière ses leunettes qui rindent plus grous ses bieux nu blus un molé viniqouttes, quoé qu'il o coêre fouait, ch'pirate èd'kien ?

-  Il o agazillé ch'lapan d'éch voésan !

-  A n'est mie Dju possibe !

-  A n'mainquait pus qu’cho Déjo qu'l'eute nez-d'beu i n'nanque print emne occacion éd nous tchier dains nous bottes I vo coére nous foute un procès, tu vos vir

-  Ch'est mie un lapan, ch'est un caouic !

-  Nan ! Ch’est un cot !

-  Ch'est einne loque à loqueter…

-  Ch'est un'lapan, j'te dis. Ch'est un tchot nain Un lapan d'connection Pour chés concours d'bieuté. A ch't'heure, avu ch'génie frénétique, i'z'arriv't à fabritcher des lapans nernus comme des zux, des lapans grous conme des vakes, des lapans avu des poéyes d'einne coudée d'long, des lapans avu des z'èrelles qui tchayent à térre, des lapans à chix pattes, des lapans avu des palmes à leus gambes pour foére dél brache-papillon dains chés intailles.

-  Tu pérles d'einne bieuté, mon Dju ! R'baye don, ch'lapan-lo i rsinpe à un 0-cèdar ! Quoé qui o à matchi dains einne balayètte parélle ? O dirouait einne bibache !

-  O né zé minge point chès bêtes-lo. Ch'est des odjets rères ! A vaut l'pieu dès fésses !

-  Tout cho, pour foère l'faro à ”Ciél, min mèrdi” coére ouais, avu ch’laïou d’Dechavan-ne !

-  Arrête. Ch'voésan, ch'est un berdleux, ch'est einne tète ed'bos, mais ch'est mie ch'genre à passer dains ch'poste avu sin patchet d'poéyes pour foère él'mariole. Nan, ch'lapan, ch'ètouait pour sin tchot-fiu d’Péris quink i vient en vagances…

- Oh la la la ! Ch'est coère l'pire èd'tout' , O vo coère én'intinde. L'eute maouleu i vo porter plante à chès soérets Attinds, chés assurances Ché primes, tu vos 'zé vir !

-  Acoute Léa, qu'i fouait ch'peufe Raymond. J'payerai ch'qui feut. Ch'est min tchien qu'o fouait l'bètise Je n'veux mie vous métte daine l'imbarro.

Bob i n'o rien dit. I pinse dains s'téte. Ch'est einne conchieince. Einne boène tète. Conme sin pére…

-  Bon, qu'i fouait. Faut point pérde ech'nord. Ch'voèsan i n'rintrero mie avint diminche o soér. Il est chez file, àch'Bourq é d'Eut. A l'heure qu'il est, i doét ramachi des seutrelles, chés tchotes kervettes, avuk éd'ieu dusqu'à s'boudinétte Ch'lapan, il est un mole' rioérchon. I n'o mie l'air trop esquintchè Bon, il est fin mort, pis ratamort ; il est atarouillé, ses poêyes i sont ratatouillés. Y o d'èl raque su s'panche, des takes d'herpe sus sin dous, d'él bave su sin toupet, s a n'est mie grafe. Léa, vo quére tin shampoing aux' zux, tin sèche-cavieux, et'brosse, tes démébérs. N'ét'rappe point, min camarate, o vo y foére un liftigne à Buggs Bunny !

Emne demi-heure aprés, ch'lapan il étoait fin rétus, shampouiné avuk du Ouachéngo, sin bleu poéye blanc passé à la laque à cavieux, un breuching impeccabe C'est simpe i n'i manquouait qu'einne tchote étinchélle éd'vie et pis ch'lapan i s'aurait érallé tout seu dains ch'courti, à pluxiner ch'vert gazon.

Bob i muche ch'tchot cadave sous s'camisole. Il        r'baye à droéte, à gueuche. Ffftt ! I file comme einne fléque droét vers s'n'hayure. Il seute su ses longues gambes. Hop et là ! Il foait un roulé-boulé su l'pelouse éd'sin voésan. Il s'érdréche. Coére un keup d'oel ein biais pour voér si person-ne l'o veu. Hop ! Direk sus ch'clapii. Aïe don ! El'béte alle pache aït aït dé s'muche à l'cabane rimplie d'vielle paile. Bob i ferme él porte. I tourne ch'loquet. Requiem in pace lapan Lé vlo r'parti comme einne andjile. Dix z'gondes après il est assis dains sin cadou à boére einne boéne tchote Kriek Vingt dé dju, qué bonté !

-  Allez Raymond ! Boés un keup N't'in fouais mie. Profitons d'él risée d'solel qu'a passe. Léa, vo quére ch'lecteur éd cédés portabe. O vo dinchi aprés mingi. R'baye don nous tchotes fonmes, Raymond, min camarade Qué bieu avintages ! T'Sido alle o r'prin du poéye êd'la bête aprés ses couches. N'torne point tin nez, mais tu sais qué t'fonme alle o un tchul qué j'in'tchérouais à térre pour des adorémus. Allez, min fiu, souris, vo foére un tchot bec à t'bieuté, à l'mére éd tes zèfants sinon ch'est mi qui t'fous des cornes !

***

El lundi, ch'voés.an il est révnu. Bob et Léa i z'ont veu d'èl leumiére dains s'moéson, àl'édéjouque, in allant à l'ouvrage. Ch't'honme il est in r'traite. Veuf dé s'fonme. Ch'est vrai qui n'est mie plézant, i n'ainme point chés caquetages, mais i l'o eu des cronques dains s'vie.

Au soér, in rintrant d'travaller, Bob et Léa i tchayent nez à nez avu leu voésan. Léa alle manque éd'cariocher. L'eute i l'o un air d'ein avoér dux. I'z’aborde d'un keup, direk, avint qu'Bob i k'minche à mangouiller quétkose.

- Y o vrairnint du drôle èd'monde àch't'heure ! qui grimache ch'l'honme. Ch'tchot lapan d'min tchot fiu il est mort sam'di au matan. J'étus pressé, jé l'ai intérré aït aït dains un coin d'min courti avant d’m’éraller vir ém'file à la mer, pour ch'ouikinde. Eh bin, vous n'me croérez point mais y o des espèces éd'nègrophiles qui l'ont sorti d'éch treu, qui 'y ont foait s'toélètte, qui z’y’ont mis d'él laque àcavieu ! Ch'poéye d'él peuve bête y sintoait l'sint-bon ! Et pis qui l'ont rinfiqué dains s'cabane ! Coêre einne secque comme chés Jéhovah ou chés Krichna ? Kèche ? Chés résuchiteux d'lapans ? Chés imbomeux d'laporidés ? Ou chés laillous d'écologisses ? Y Qué vie qu'on vit ! Graind dju ! Ouk ch'est qu'o vo ?

Michel Debray