Chuperman picard !

Monsieur et Madame Bitibréro ont deux fils.

Yves et Romain.

Yves et Romain Bitibréro (I véro min bite, i brérot)

Cette saillie (si j’ose dire) introduit (si j’ose dire)

cette histoire de SUPERMAN-PICARD,

librement inspirée d’un film de Luigi Comencini : Italian Superman, sketch dans un film pluriel : "La fiancée de l'évêque"

Tét’éd’Glain-nes avouait reprind l’camionnette éd’sin défuncté pére qui vindouait des frites, des beingnets pis des gueufes su ch’l’avenue Foé à l’épotche d’ousqu’i avouait coére-lo des baraqumints éd’l’apreu-djére et pis qu’Anmiens r’san-nait coére à ein-ne chité abolie par chés bombardémints. Mais l’ville alle s’étouait modernisèe, ein molé moins rade qu’ez’zeutes bé seur, mais à forche à forche alle étouait edvénue ein-ne capitale région-nale potabe. Et ch’n’est point à mi qui l’o conneu noérte et plein-ne éd’raque et d’misére qui fadrouait dédire éch’contrére. Anmiens s’étouait meudernisèe, alle étouait dév’nue fin rétuse et Tét’éd’Glain-nes avoait deu s’éraller à ein-ne eute plache pour vinde ses frites. Fil à m’zure d’éch teimps qui passouait et i s’étouait r’trouvé su l’bord d’él Nachionale 1, dains un mécant  tournant du keuté d’Berteul-sur-Noué.

- A n’pus qu’maintché, qu’il o dit à s’fonme, ein-ne tchote bellote forte en téte et rouaide in djeule. O vo inventcher ein-ne espéchialitè picarde pis o vo aller l’vinde à Péris.

- A Péris ! Qué laïou qu’teu fouais ! Et pis tchelle idèe d’aller invinter ein-ne espéchialité ? O n’o-t-i point déjo chés landimolles, el tarte à l’badrée, chés flamikes à poérions, pis coére d’eutes keuses !

- T’os réson nou tchote. N’impéche qué j’vos m’peuser dains ch’quartier d’él Guére du Nord…

- Où cho, d’vaint l’Tour Perret ?

- Nan, l’Guère du Nord éd Péris. Pis lo, o vindrons nous prodeukchions.

- Es-teu bié résonnabe, m’n’honme ?

- O n’peut pus vive comme no. Ch’est mie possibe !

El vie étouait casvéle d’pis qu’Marie-Maronne avouait été tchittée su ch’carrieu d’es interprise éd’fabritche éd’keuchettes qu’alle avouait dépeusé sin bilan. Ech’coupe i n’roulouait point grameint su l’or. I vivouait dains ein-ne titchotte moéson tout seue à deux pos d’éch chimetiére éd’Beuvoér. Comme no, i n’échouissait point chés voézans quaink Marie-Maronne alle djeulouait à can et à décan éq’ Tét’éd’Glain-nes i li f’zouait s’affouére. Dains ses boins jours, Marie-Maronne ch’étouait ein-ne fumelle qu’alle avouait éd’z’orgasses qu’à keuté, chés trimblémints d’térre ch’étouait des décatoulles éd’nazu sul’pieu d’un touére…

Adon Marie-Maronne a n’s’est point d’troup fouait prier pour s’laichi convainque per és’n’honme. Tét’éd’Glain-nes il avouait l’caboche près d’sin capotin. I z’zé voloait ses espéchialités. Il s’est ramintuvé d’sin joéne temps. Quaink i étouait ach’Collége, il avouait fouait un voéyache ein Forêt noérte et pis s’tchote correspondainte dé Stuttgart a i avouait fouait goutè à chés Kaiserschmacher. Tét’éd’Glain-nes i n’avouait jamouais bié comprind chi ch’mout-lo cha volouait dire chés déliches d’éch Kaiser, ou chés breuilles d’éch Kaiser o coére chés dédjeulis déch Kaiser Franchoés-Joseph, ch’l’honme à Sissi, par él’fait. Ch’étouait boin n’impéche et pis a t’nait au corps. O n’avouait dains s’panche. Ch’étouait ein-ne sorte d’omélette badrée avu des bengnets, ein-ne dravie d’ux battus avu del frangne pis du chuque. Chonq mille tchalories pér assiettée.

- Goûte don ! qu’il avouait dit à Marie-Maronne.

- Ch’est pététe boin, mais a n’est mie bieu. O dirouait du bloubiboulga ! Chés Frisés, ein tchuisine, ch’est toudis comme no : chés r’cettes i finiss’t ein ragougnasse dains un tchul d’castrole !

- J’m’in vos l’mouler dains ein-ne fourme, qui l’o rinfitché Tét’éd’Glain-nes.

Après des heures éd’traval à n’avouér du mo, i o fini per fabritcher des tchots berlindindins qui r’sannouaient tout d’ein-ne à des tourtieux à vaques.

- A n’est mi plésant ! qu’alle o fouait Marie-Maronne. O dirouait du bren d’madgette.

- Ouais mais ch’est boin. Cha o l’air d’ein-ne bablute éd’poésan, un chuchuq d’écologisse. Chés Périsiens i vont n’éte matchés. O vo z’app’ler chés tututes picardes. Fachile à r’ténir. Chés tututes picardes. Conme i o déjo chés bétises éd’Cambrai pis chés niniques keudes éd’Tchibron .

Tét’éd’Glain-nes et s’fonme i z’ont été quére un log’mint à Péris. Avuk leu tchot bos d’lain-ne pis chés primes éd’lichincimint i z’avouaient’ tout jusse éd’quoé acater un mitan d’cagibi. T’es dains ch’mitan d’éch salon. Teu fouais un pos, hop ! t’es dains chés cabinets-douche. Assis su ch’tron-ne chi teu vux fremer l’porte i feut qu’teu t’ramonchéles comme un cabotan d’toéle. Chi teu fouais ein-ne embardèe dains ch’racoin qui serv'’t éd’tchuizine, teu t’értreuve avuk tes bros dains ch’four d’un mécant rékeud à gaz. Teu gaignes d’él plache si t’fonme alle keupe ses ongues et pis chi ti teu rasses ét’berbe.

I n’ont-i visité des estudios pis des sous-peintes, mon Djiu ! A none i étouaient’ té r’crans. Pour finir, i z’ont été quére leu caravane qui z’avouaient’ dains ein-ne pature dains ch’coin d’Srizin-Gaillin dousque Tét’éd’Glain-nes i allouait dés foés à l’péque et pis i l’ont peusée dains un camp d’Romanos dél banliue nord éd’Péris. Marie-Maronne, pour c’mincher, alle étouait épeutée d’vir tous chés gens d’éch voyache conme i dissent’chés gazettes. Tét’éd’Glain-nes i disouait mie rien mais i n’in menouait mie larche non pus. I z’étouaient’ tellmint angoucheux qui n’n’ont peu fouére l’amour pindaint quiques smangnes.

L’preume foés qu’Tét’éd’Glain-nes il o installè s’baraque à reulettes su ch’pavé périsien, il o eu bel et rade él visite d’un sarkosauré, un sarkoflic si o volez.

- O z’avez eine autorisachion éd foére vo commerce ichi ? qui d’minde ch’coboye  d’un air point aimabe. I r’sannouait à un Hova d’Madame Oscar conme mon onc’ Fernand i l’avouait ein-ne grévure éd’ l’Esposition coloniale éd’Treinte Chept.

- J’vins jusse d’arriver lo. Si cha marche ej resse et pis j’vos vir à l’préfecture à m’foére foére chés papiis pis chés dotchumints. Si que j’sus rimbarrè per chés Périsiens, j’rinfique tout m’attiral pis j’m’in r’tourne dains nou poéyi.

- Je n’vus point l’sawoér. D’qué poyis qu’oz étes, d’abord ? O z’étes Frainchis au moins ?

- Euh ! Ouais ! Nan ! Enfin, j’sus Picard.

- D’où qu’o vous logez ?

- Dains ch’campemint d’chés Manouches, là-bos à…

- Allez ! Ej vos imbérque ! Ach’ posse ! Aït aït !

Ch’peufe misére éd’ Tét’éd’Glain-nes il o resté à ch’corps dé garde déch’Dix-huitiènme arrondichmeint avuk des fonmes éd’ maouaise vie, des honmes dédjisés en marie-greuette avuk dél poétrangne comme no pis leu berbe bleuze qu’alle pouchouait d’sous ch’fond d’teint à l’piqtchette d’éch jour.

Ch’est Marie-Maronne qui l’o défiqué d’él galère avuk l’éyude d’éch Maire d’éch l’arrondischmeint, un nommé Vaillant, anchien minisse éd’l’intérieur.

- Ah ! Oh z’étes picarde, qu’i y avouait dit. Alors conme no, o connouaissez pététe m'in camarade Francis Lecul, perdon Francis Lec.

- Si fait, qué j’él connouais, qu’alle avouait dit Marie-Maronne qu’étouait un fine mouke. Francis Ch’tchul, pinsez sik j’él connouais. Jé connouais qu’li. J’ai meinme collè des affiques por li, pour chés éretsions.

- A n’est mie djiu possible !

- Conme ej’vo l’dis.

Avuk ein-ne bielle autorisachion chignée pis teimponnée pér éch’Maire dél’Mairrie d’éch’dix-huitiènme li-minme, Tét’éd’Glain-nes i n’avouait pus d’cronques à awoér. I s’a rinstallè su ch’trottoér pis il o c’minché à vinde ses tututes picardes. Chés passants i n’f’zouaient d’trop mie entention à li rapport qu’éch’quartchi-lo ch’es putout kebab et compaignie. N’impéche, tous les soérs i ramnouait des sous à Marie-Maronne qui préparouait chés tututes dains l’caravane, pour él’lendeman. Finalmint, chés Romanos ch’étouait des braves geins. Chés nazus, i n’avouait plein qui juaient dains chés raques, i v’nouaient d’minder quiques tututes à Marie-Maronne.

- Bon, ch’est assez, achteure. O z’allez m’matcher tout m’réserve. Quoé-t-ch’est que j’vos donnè à m’honme. Allez ! Artornez dains vos roulottes, monts d’bren !

Un soér, au moumint d’fremer s’boutique, Tét’éd’Glain-nes i voét arriver troés joénes rastaquoéres avuk des tchastchettes à visiére à rbou, des survét’mints qu’a valouaient rudmint des sous, pis keuchés éd’sandales à grousses esmélles pour… esmer chés polices.

- D’où qu’t’arrives, ti, avuk ét’abistocage éd’fouillak ? Ma pérole, on vo t’berziller ta mére et les tayons d’ta race, eh ! acarien ! mécante gale ! paillasse !

- Quoé qu’o volez, més fius ? Jé n’sus mie malému. Jé n’sus mie racisse non pus. Dains min poéyis, o vo l’dirouéche. Quoé qu’o volez d’mi ? J’sus jusse un tchot commerchaint qui vut gangner sin pan à la sueur dé s’brongne.

- Nous, itou ! Djeule in biais ! O vut prinde éd’la thune à la sueur éd’tin front à ti, peuve étombi !

- O z’étes des malaprins, des pirates, des maouais !

- Mouque tin nez, teu nous dégrate, eh ! bobin d’Gauloés ! Arrét-té ed’nou prinde nou tiéte avuk tes l’çons d’morale éd’marister. Ch’est simpe, si teu vux seuver t’pieu, teu nous don-nes tous les smangnes chonquante pour cheint dé t’récette, ou o t’dépieute conme un lapan !

- Galapias, voéyous, tchuls brenneux !

- O nique et’mére in cotron su ch’parkigne  éd’Dobel.

- Manman, i o longteimps qu’alle o défuncté, peuves nazus !

- T’os veu c’mint qui nous keuse, ch’bétal éd’sa race ! O vo t’esploser t’gargatte, eh, matcheux d’fricasse !

Tét’éd’Glain-nes il o bieu s’erdébatte, i n’est mie ch’plus fort meinme si i n’est mie ch’pus tchoeurfalli. Aïe don ! Chés keups i pleuvent’ su’s’brongne. I tchait à terre. Z’zeutes i li foutent des ramponneaux dains s’panche, dains ses coterettes, dains ses gambes. Tét’éd’Glain-nes i protége es’cahouette du miux qui put mais s’n’avinteure alle torne à niele. Il est aroyé. I n’in put pus. Il tchait dains les ponmes. Amein !

- Ti, otchupe-té dé l’tchaisse.

- Ouéche ?

- Lo ! Vinigoute ! El boéte à gatieux ein fér. Tous chés péquenots i sont paréls. Leus euros dains des tchotes boétes. Ah ! chés viux tchuls !

- Ti, prinds ses keuchures ! Défais-y s’lévite ! Ote-z-y ses maron-nes à ch’ bâtard ! Don-ne mé s’kemise !

- O n’y laiche sin caneçon !

- Ouais ! O n’no vo point laicher mernu à z’zétoéles ! Oh ! mais quoéque ch’est qu’éj voés ?

- Quoé don ?

- Ch’dépeindeu d’aindoulles i l’o muchè des sous dains sin caneçon.

- Foais vir !

- Oh ! Nom des Zeu ! qui dit ch’ti qu’o infiqué s’man dains l’brayette de ch’caneçon. Rbayez don ch’mourcieu ! Ch’est mie un zguég qu’il o, ch’est un vrai bazooka !

- Ch’est un pic, ch’est un cap, ch’est ein-ne péninchule !

Avuk un tel machin, c’mint veux-tu que j’t’in…

- Ferme et’guife Rachid ! En’soés point malhon-néte ! El fait est qu’il est monté comme un beudet, ch’camarate !

- Attindez vous eutes, avuk ein-ne andjille parélle dains s’Emineinche, nomète i put intérecher Crémieux ch’l’agoreu.

- Qui tch’est chti-lol ?

- Ch’est un mossieu, ein-ne pointure, i tchient un cabaret vers Pigalle. Il est tellmint tchupide qu’il o vindeu s’mére, ses files et pis sin tchien à un tchaïd ed’Macao.

- Capieu bos ! Cho ch’est un honme !

Tét’éd’Glain-nes i r’prind connaichaince mernu conme un ver éd’vant un grous pére in route à feumer un grous cigare.

- Teu vos ouvrer pour mi, qui dit Crémieux ch’l’agoreu.

- J’travalle déjo, qui dit Tét’éd’Glain-nes, à mitan sneu. J’ai du mo à m’téte, à m’panche, dains min dous, tout pértout.

- Chés tchots maque ét’naze, ch’est des malates minteux. N’te formalise point.

- O n’n’avez d’belle. Jé m’formalise passe que j’ai du mo tout pértout. I m’on agasillè.

- J’vo foére éd’ti eine vedette du chaud-biz, qui dit ch’l’agoreu.

- Mais je n’sus mie aux assedic. J’vinds des tututes.

- Pis mi ej te feume et’caboche éd’poésan d’Camon si teu d’vises coére.

Crémieux i sort ein-ne pétoére du djabe éd’sin paltot. Tét’éd’Glain-nes i comprind qui vo miux fremer s’guife.

El soér minme, ingancé dains un costume éd’Chuperman Picard, avuk un maillot bleuze, Chuperman Picard ein noér écrit dains un écuchon rouche, ein-ne grande cape rouche et un collant inde dousque s’bistière a s’détake ein ganne fluo, Tét’éd’Glain-nes il est dains chés coliches d’un tchot théiate. I n’in méne poé larche.

- Et voici maintenant notre nouvelle attraction qui va vous étonner Monsieur, qui va vous faire rougir, Madame, un phénomène extraordinaire : le Superman Picard !

Roul’mint d’timbour. Un ridieu s’oufe. Tét’éd’Glain-nes apparaît dains l’leumiére d’eine pourchuite. Ses yeux i clign’t. Il ouvre s’brayette.

- Oh !

Dains ch’public i n’no qui z’ont l’soglou tellmint qui sont épaveudès.

Musique. A gueuche ein-ne fonme arrife, ein-ne bieuté, Adriana Carembeu, si o volez, mais in miux. Un tchot détal qui o s’n’importainche : alle est mernue conme à ch’jour dés naichaince, mais… édpuis alle o graindi pis alle o rud’mint forchi, ch’est mi qui vos l’dis.

- Ah ! qui fouait ch’public ein milant ch’l’effet que l’arrivée d’él fonme alle o fouait sul’bébette à Tét’éd’Glain-nes.

Meinme Adriana Carembeu a n’est saisie. Mais the show must go on, conme on n’dit point in Picardie : el bieuté alle vo s’ajouquer seur un graind lit ein égaroulant ses grannes gambes, Tét’éd’Glain-nes i approche, avu d’vant li sin espadon qui berlotte. Il infique s’n’affouére du miux qui put lo ouk’ch’est permis pis lo ouéche qui o dél plache. Ch’est un spectak à vos keuper vou respirachion, o n’intindroait ein-ne mouke volè dains ch’théiate. Meime éch’pompii d’service i n’n’est bléte.

Ein-ne foés bien amiclotè, Tét’éd’Glain-nes i s’arlicote, i s’démoline, i s’démian-ne, i friole, i garlope, i s’in r’don-ne, i fourdine, i persétchute, i foutrique à qui miux miux dusque l’fonme a s’mette à piuler, à braire, à chouiner, à roualer, à djeuler conme un courlu et pis à tchaire à mitan morte.

Chés spectateurs i appleudissent, i pouss’té des vivas. Tét’éd’Glain-nes i salue, i rinfique s’n’outil pis i s’in vo. Chés geins i z’i font un rappél.

- Bis, bis ! qui en o qui crient’.

N’peut qu’maintché, l’nuit-lo, Tét’éd’Glain-nes il o rapportè à Marie-Maronne un bieu patchet d’banknotes.

- T’eu n’in fouais d’boin-nes affouéres, m’mhonme ! Ch’est-ti qu’chés Périsiens i peindrouaient goût à nos tututes, qu’alle o dit ein éd’venant caline pis fin amiteuse dusqu’à c’que Tét’éd’Glain-nes i r’mette ch’couvert, conme on dit à Péris.

Mais Marie-Maronne ch’étouait mie Adriana Carembeu. Elle, quaint alle o pouché ses cris d’arlicoco, tout ch’campmint d’Romanichéls il o été réveilè.

- Ch’est mie rien, qu’il o dit Tét’éd’Glain-nes à chés tchurieux qui z’étouaient v’nus vir qui tch’est o n’agasillouait chez ch’Gadjo éd’Picardie. M’fonme alle o des coliques frénétiques. A i est passè.

A don, tous chés matans, Tét’éd’Glain-nes i quittoait s’caravane avuk ses boétes éd’tututes qui jétouait droét dains l’preume poubélle. Pis i s’baguenodouait dains Péris à r’bayer chés vitrines pis chés geins. Des foés il acatouait des habillures ou des brillants pis toutes sortes éd’bébelles por és’fonme. Pis au soér il allouait traintchill’mint à ch’téiate pour foére s’n’ouvrache.

Ch’métchier-lo il o l’air agréabe, n’impeche qu’à forche, Tét’éd’Glain-nes il étouait rcran tant pus qu’Marie-Maronne alle asséquouait achteure tous les soérs quaink i rintrouait d’éch’téiate. I feut dire qu’dés Gitanos i attindouaient  l’intrée in scein-ne éd’ Tét’éd’Glain-nes dains s’roulotte pour accompagner ch’carambolage avuk d’él musique pis des canchons éd’flamingo.

Crémieux il o foutu Adriana à l’porte, il l’o reimplachie par ein-ne coére pus rétuse éq’l’eute pour affriolè sin Chuperman, mais rié n’y fzouait. Tét’éd’Glain-nes il étouait alandri, flobi conme ein tchot viux.

Lo, Marie-Maronne alle o ieu des soutçons. Pass’qu’à l’caravane itou s’n’honme i étouait tchoeurfalli. Un bieu matan, alle o sui Tét’éd’Glain-nes pour él’miler, alle o mantché d’él indjeuler quaink alle l’o veu in route à foute chez tututes dains ein-ne boéte à zordures.

O soér, alle o prind un billet pour ch’téiate et lo, alle o veu sin funomène in route à queutcher ein-ne mécante fon-me qui i volouait s’honme. Tét’éd’Glain-nes i fzouait des efforts dé gvau pour arrivè à ch’bout d’sin liméro d’chirque. I étouait ach’bord éd’tombè faibe. Cha n’étaouait d’troup pour Marie-Maronne. A s’a l’vè d’sin cadou, alle o tchulbutè chés geins pis alle o montè su l’scein-ne pour foute s’rivale à bas d’éch lit, alle o rtirè tous ses loques pis alle s’est ouvrée à sn’honme qu’o r’trouvè s’n’érétsion conme pér mirake.

Ch’tintamère qu’alle o fouait Marie-Maronne quaind alle o prind sin plaijir, ch’est inimaginabe. Troés mille déchibels. Pire chés avions à Roéssy. Chés sonoton-nes i éclatouaient dains chés érelles éd’chés vieux sourdingues, chés keupes éd’champaigne az’brizouaient, i o mein-me eu des décheintes d’organes dains ch’théiate, mais au final, qué triomphe; mon Djiu, qué triomphe !

O n’o moins rigolè quaink Crémieux ch’l’agoreu il o dit à Tét’éd’Glain-nes :

- Ti, teu n’vos pus ein-ne chique ! T’es boin pour ch’balage. Du resse, j’vos t’baler. Mais j’garde ét’fonme. Ch’est ein-ne grain-ne dé star. J’y doupe minme sin cachè. Ch’est elle el’novelle attratsion. A vo fouére ch’liméro avuk Piotr ech’Letton. Et quoé t’foute des compleskes, min paure fiu, teu véroait c’mint qu’il est achalindè. Feut l’vir…

- Tu m’os berlurèe peindaint des smangnes, qu’alle o dit Marie-Maronne à Tét’éd’Glain-nes. Jé n’vux pus d’ti. T’es qu’un minteu, un imbleyeu. Mi j’resse-lo conme intermitteuse d’éch’spectake. Ti, t’es qu’un intermiteux. Tu pus t’éraller au djabe.

Ch’est conme no qu’éch paure martyre éd’ Tét’éd’Glain-nes i s’a retrouvè d’vint chés Wépes au graind complet. I étouaient tertous-lo : Ch’Laurent Devîme, ch’Wépe in chef. I avouait Olivier Ingelaere, Thierry Sellier, ch’persidint d’Tertous, Jean-Marie Thomas éd’Woignarue, Jean-Marie Franchoués d’Addville, Jean-Michel Ansard ch’régisseu, i avouait meinme Ivar ch’Vavar pis coére Jean-Luc Vigneux d’éch’Lanchron, ch’est vos dire. Du bieu mon-ne. Pis coére d’eutes équ’joblie. J’y étouais, mi auchi, chinon, qui tch’est qui racontrouait ch’l’histoère ?

- Teu viens foére l’artisse ? qui d’minde ch’Laurent à Tét’éd’Glain-nes.

- Si fait. J’viens d’Péris.

- Cho n’est point ein-ne référeinche, qui rinfique nou Wépe. Quoét’ch’est teu sais foére, à pért des tututes pis des landimolles ?

- Cho, qui dit Tét’éd’Glain-nes fin fiér éd li ein faisouant tchaire s’maronne pis sin caneçon.

Ch’Laurent i rbaye eul’misérabe alleumelle qui peindoulle intre chés tchuisses à Tét’éd’Glain-nes et pis i dit, roéyalmeint :

- Si tu vux juer à ch’ju dél plus tchotte biloutte éd’ chés Wépes, n’te fouais point d’maouais saing, min fiu, ch’est ti qu’o gaingnè !

Adon, achteure, mes gins, quaink o z’irez acater un cornet d’frites sur un à-cotè d’route, pis si o n’avez mie peur d’érchevoére ein-ne bassine d’juile su vo brongne, d’mindez, por vir, ach’mérquant d’frites :

- Hé, ch’est ti, Tét’éd’Glain-nes, ch’Chuper-Picard, qu’o plus tchotte  bisoutchette éd’Picardie ?

Dit pour la première fois à la Bibliothèque municipale d’Ault

le 24 juillet 2003-08-10

à l’occasion du premier Festival ed’ChésWépes éd’la cote

Michel Debray