Diminche éd’Choule

Ch’l’histoére que j’vos vos raconter, ch’est ein-ne badrée d’mintiries et pis d’véritès vraies. Ch’est ein-ne dravie éd’person-nages qui ont vétchu, éq j’ai con-nus, qu’em’mémoére alle o arcordés d’apreu chés ramintuvries ed’chés vius geins.

Eun’soyez mie épaveudès per chés anachronisses qu’oz’allez intinde dains m’n’histoére. J’ai mélingé, touillé chés geins pis chés épotches mais y o ein-ne eunitè éd’liu conme dains chés tragédies éd’Rachin-ne. Ravnel. Ravni, ch’est mie loin d’ichi, Ravini ou Ravna, ch’poéyis d’chés Mounas.

« Ch’Mouna d’Ravna,

Il o cassé sin na

Su’l’planke à lava »

O n’sait mie quoétch’est qu’un Mouna… Ein moénieu ? Un ramoneux ? Mi, j’ai m’n’idèe, mais ch’est jusse ein-ne idèe, ein-ne sorte d’intuichion…

A l’épotche éd’Charles-Quint (éch’preume Tchot Quinquin, pétète), chés Espangnols i étoét’ in Picardie. Avuk chés rastacoéres ed’l’armée ed’Charles-Quint, y avoait d’fin rétuses bieutés à noérs cavieux pis à pieu bise : ch’étouait d’Indalouses, des Romanichéles, d’Gitan-nes qui foésaient caintinières ed’larmée d’Espangne. Chés Picards d’Ravni i z’ont treuvé à leu goût chés tchotes Gitan-nes avu leus cotrons à volants, leus yux noérs pis leus cavieux de cornaille. I n’nont été matchés, bleuzes, assotès d’chés Esméraldas. Feut croére chés fon-mes-lo a n’ont point restées insensibes à chés honmes blonds pis à chés roux-poéyes d’éch’poéyis picard. Adon a sont d’meurées-lo pis a z’ont fouait d’bieux z’éfants. Chés Mounas, à m’n’avis, ch’est chés fius pis chés déchindints d’chés « Gitanas cubiertas de flores ». Cho, ch’est du picard ed’Grenade…

Dains m’n’histoére, y o ein-ne eunité d’temps. Cha s’pache ein diminche ed’fin carînme. Ch’est l’fin d’chés courts-jours, ch’est l’fin d’chés néges et pis d’ech’froéd d’leup. O s’ertreuve dains ch’solé d’un jour d’ernouvieu : él’diminche éd’chés Brandons, pis o vo s’agaziller, s’foute des baffes, s’bataller pour éd’rire, histoére de s’décaniller un tchot molé pis d’s’égarouller ses gambes et pis ses bros et pis, ch’est cho ch’plus bieu, o vo boére ein boin keup !

Pis y o coére ein-ne eunitè d’atsion dains m’n’histoére. Ch’est la Choule, un viux ju éd’nos taïons pis d’nos ratataïons. El choule ch’est ein-ne sorte ed’rugby médiéval avuk des régues simpes : apourter ch’choulet, ein-ne boule éd’tchuir rimbourée d’oster, dains l’chibe éd’chés adversaires, dains ch’camp d’chés hin-neux.

Ch’diminche-lo, tous chés geins, i sont tertous rassan-nés par-édvant l’Mairrie à l’entour d’éch’molumint à chés morts d’él Grainde Djérre.

A gueuche, y o l’rue d’éch’Tchot Bail avu sin flo à canerds pis chés peufes moésons d’chés varlets à Ch’Leup-Wérou, ch’pus gros tchultivateur d’éch’poéyis. Su’ch’mur éd’briques ed’mon Van Der, ch’cinsier flamind, i o l’chibe ronde où qu’chés céribataires i doévt’té laincher ch’choulet.

A droéte, y o ch’quatékmin avu l’rue d’Léglaintchi, pis rue d’Eglise avu sin bieu et grous clotchi, rue d’él Poste et pis l’Grainde Plache, l’Place d’éch’Graind Bail, et pis l’Grainde Mare, pis ch’Café Victor ouéch’qu’chés honmes i z’ont rattindu qué ch’Tchuré il espédie s’messe pour qu’chés fonmes alles rintent à leu moéson finir ed’prépérer ch’dîner du diminche midi.

Su’ch’mur inter ch’Famiristére et pis l’ferme à Marichal, ch’est-lo qui o l’chibe ed chés honmes mériés qui n’ont qu’à foére troés pos pour es’placher in définche en seurtant éd’mon Victor où qu’ch’est qui z’ont lapeu leu bistouille d’après minger.

A troés heures d’érmontèe (j’parle d’l’heure bettraves d’avint-djérre), ech’Maire, ch’Berdleux i prind ch’choulet qu’éch’Bohér, éch’Garde i l’avoait sous sin bros. I foait ein tchot laïus mais i dit li-minme qu’i n’sait mie gramint d’visi d’vaint chés geins. I dit qu’éch’Garde i vot foére ein roulmint d’taimbour pis qu’o vo s’értcheullir à l’sainté d’chés morts d’éd Soéchainte-dich pis d’él Djerre éd’quatorsse. Ch’Garde avuk ses grous sourcis qui épeutent chés nazus i s’édzétchute. Ein-ne mineute éd’chileinche qui dure vingt sgondes et vlo l’fanfare qu’alle joue l’Marseillaise. Chés z’honmes i rtirent-té leu capieu, leu tchachtéte, chés nazus i z’otent leu bérét. Chés fonmes al’braient douch’mint in s’ramintuvaint chés morts éd’l’an-née. Chés pompiis i font ch’chalut mirlitére, seurtout’ ch’adjudaint-chéf Poélleux, rouge conme ein codin d’avoér d’troup matché à tabe et d’troup ferlapé mon Victor.

Ch’Berdleux i dit conme no :

“Ouéche qu’alle est l’darin-ne mériée éd’l’an-née ?”

I fouait esprés d’point l’vir el’file Matchulotte : Marie-Régina, ch’est sin tchot nom, veu qu’ch’est file d’éch’l’adjoint qui y o fouait ein affront d’vaint tout ch’consel, rapport à ch’l’ouvrache qu’éch Maire il o dmindè à ch’Bohér pour es’méson à li pis pour s’in courtil à li.

« Chi tous chés conseillis i fzouaient conme ti, quoétch’est qui restro à ch’Garde conme temps pour ouvrer pou’l’commeune ? » qui l’o dit à ch’Maire sin adjoint Matchulotte.

S’file ch’est ein-ne bielle rude fumelle blanke ed’pieu pis noérte éd’cavieux. Mais chés geins i ne l’ainment pus d’troup édpuis qu’alle o fréquintché ein espéce ed’Malin d’Bulles et pis qu’alle o forché ch’peufe horsin à s’mérier avuk elle in li fsaint croére qu’alle avouait ein porichinéle dains sin tiroér.

In teurnaint sin nez, ch’Berdleu il tin ch’choulet à Marie-Régina qui sourit ed’tous ses deints. Ch’Tchuré il l’ben-nit in romionant des paternoster.

« Nou pére qui étes aux ciux, eq vou nom soye sainctifié, eq’vou reingne i vieinche, et vous quate volontè a soyent faites, don-nez-nou einhui nou pan quotidgien, en’nous laichez point sutchoner à l’teintachion, et délivrez nou d’éch mo. Amein-ne !…. Allez-y m’file ! Invoyez ch’choulet !» qui fouait Mossieur l’Abbé. 

Marie-Régina alle baiche pis alle léve ses bieux bros blancs pour laincher en l’air ch’choulet, ma foé, coére assez lourd. Ch’Tchuré i n’in profite pour miler ahite ahite chés poéyes ed’sous ses bros pis sin décoltè qui fouait inrager ch’vielles guernoulles éd’bénitchii qu’éch’tchuré i appelle « mes torquemedas » !

Ch’garde il échouit tertous avuk ein roulmint d’taimbour du djabe, Siméon ch’graind dépeindeu d’aindoulles, il don-ne ein keup d’grousse caisse pis pis d’cymbale pis tout’l’fanfare alle jue ein-ne musique espéchiale « Jour éd’Choule » equ’sin chéf : ch’Malapatte il o compeusée li-minme.

A ch’moumeint-lo, Poulatchi, ch’marquand d’glein-nes, ed’cayin-nes et pis d’codins il attrapée ch’choulet qui tchait su’l’téte à l’file Tatasse in n’y dérachaint quéques cavieux ;

« Feusoez entention à m’caboche ! » qu’alle glapit avuk ein-ne voé d’marie-greuéte.

Edjo ch’est ein-ne terribe mélée qui s’ramonchéle su’l’croéx d’chés martyres, ch’paradis d’chés crapieux pis d’chés vers éd’térre. Dains ch’l’affoére-lo, chés joénes i sont désavintagès à keuse qu’el rue d’ech’Tchot Bail al monte et pis qu’el rue d’l’Eglise alle déchind. Ch’Cadoreu, ech’fiu d’éch’geindarme à gvau ed’Saint-Ju-in-Keuchi, i prind ch’choulet au vol, mais i voét ch’père Forte-Poétrangue qui rabzine conme ein ran. Ch’est un maousse avuk des mans conme dés battoérs qui vo mieux z’zé vir dains ses pokes equ’ su nou brongne. Ch’Cadoreu i fonche conme un toére dains l’grousse panche à Forte-Pouétrangne. L’eute in’in tchait à terre à mitan étoké.

« J’ai l’soglou ! » qu’i dit.

- Boués d’d’ieu qu’alle i dit s’fonme, Mélie Brend’Judas, rapport à s’pieu qu’o rbayé ch’solé à travers ein-ne passoére. Boués d’d’ieu ! Cha vo l’foaire passer !

- Mi, boére ed’dieu ! Jamoais ! qu’il y rinfique s’honme, ej’sus hydropathe ! »

Ch’Cadoreu i monte, i monte el’rue poursui par chés honmes pis chés mont d’bren qui cour’t après eux maugré chés cris d’éch’Garde et pis d’chés fonmes. Poulatchi i tégue conme ein-ne vake. Ch’pére Davin-ne, ech’viu maricho, i fouait ein croche-pattes à ch’joéne fiu d’sorét qui tchait dains chés raques. Anderson, dit ch’Batard d’Inglais i ramache ech’choulet. Li ch’est ein rude wépe, i cavale à fond d’tran dusqu’à mon Van Der. I vise ech’talvar d’él chibe su ch’mur. Lo, y o Brézette qui attrape sin bros ? Ch’choulet i s’erbondit su ch’tos d’fien à Van Der. Ch’tchien d’el férme i djeule à sin foaire péter s’gargatte. Vlo tout chés chouleux qui s’amonchélent dains ch’puria.

« O n’etes pu dains ch’ju ! qui maoule ch’Maire.

- Quétch’est qui vous feut ! qu’alle rigole Marie-Régina. Du jus, i n’nont plein leus loques ! »

Chés fonmes pis chés files alles s’égozillent à l’porte d’él férme. El fonme Van Der alle sort de s’méson pis ed’sin perron a rbaye ch’tableau avuk ein air déméprisant.

« Fous-mé tous chés geins, tous chés pourcieux-lo à l’porte ! qu’alle dit à s’honme in flamind vu qu’alle o toudis erfusé d’perler in frainchais et à maléze in picard !

Chés joénes i z’o comprind qu’il feut rseurtir dains l’rue. Chés honmes i z’ttindent. Ch’Maire i rprind ch’choulet plein d’bousa pis il er’lainche.

Ch’Capitain-ne – sin taïon il étouait zouéve dins ch’larmée colon-niale – i ramache ch’choulet. Li, ch’est un coureu formidabe - mais i o qu’es’fonme qui né l’sait point. Pour s’écaper d’ein-ne binde éd’joénes, i tourne à l’intour d’ech’puits d’él’Mairrie pis i déchind tout d’bout vers el Grainde Mare ouéche qu’chés gvaux i viennt’té laver leus grous chabouts et pis ouéche qu’chés barous i s’rimplissent d’ieu chés jours ed’tchanitchule o quaink i o un fu conme él’jour ed’la Sainte-Berbe où qu’chés monts-de-bren i z’ont eu un mo d’fou pour explitcher à ch’l’adjudaint-chéf Poélleux qu’el férme à Léo alle breulouait peindaint ch’banquet d’chés pompiis.

« Ahite ! Ahite ! Y o ch’fu mon Léo ! El’nue-paille alle finque !

- Qu’oétch’est que teu nou cante, min tchou ? qui dit Ch’Poélleux, A n’est mie Dju possibe ! Point pindint qu’o minge, allons ! Ch’est ein-ne cronque ! Ch’est pour ed’rire !

Quand l’moto-pompe alle o été en atsion, l’férme à Léo alle avouait étè rendue in chindes…

Adon, vlo ch’Capitain-ne qui dégavale mais i tchait nez à nez avuk Carafon qui li barre él’route avuk ses grainds bros conme pour arrêter un gvau imballè. Ch’Capitain-ne ch’est mie ein-ne meuviétte, el’vlo à traverser ch’flo avu d’d’ieu dusqu’à s’boudinette. Chés joénes i n’osté point l’suire dains l’mare à keuse eq’Marcel, ch’fiu à Tajeux, ch’ferrailleu pis forain avuk sin manéje ed’bidets, il s’a intaillé sin pied su un grous morcieu d’verre et que d’pis ch’temps-lo il marche avu s’gambe roéde et bleuze pis avuc des bétchiles.

« Sors ed’lo, qui crie Monsieur Lebel, ch’Marister, teu vo attraper l’polyo ! »

- Ej’sus trop viu pour attraper eine chifferne ed’nazu » qui rétoque ch’chouleu.

Et pis Ch’Capitain-ne i n’intind pus à keuse d’éch carivari d’chés timbours, d’él grousse caisse à Siméon pis d’chés cris d’éch’ zéfants. Il est tout seu à ch’mitan d’éch’flo. Tous chés zeutes chouleux i l’attindent su ch’bord in pierre d’ousque des générachions d’Mounas i z’ont essayé d’péker des guernoulles avuk ein tchot bout d’loque rouche infiqué sur un haneçon in fil éd’fer.. Y o jamouais ieu d’guernoulles. Seulmint des crapieuds grous conme des vakes.

Ch’Capitain-ne i est tout seu au mitan d’el mare. Tout ch’villache i l’est su l’bord, chés honmes mériés pis chés céribataires in téte. Ch’Capitain-ne il essaye éd’feinter en fouaisant un clognou à sin bieu-frèére Bas-du-Tchul mais il envouét ch’choulet à sin cousin Natole. Ch’est ch’Crac, un cinsier qui rsanne à ch’l’honme ed’Néandertal, roux-poéyes avec des grousses arcanes souricières qui z’avainchent, qui l’attrape pis qui s’décanille en débagoulant ch’talus d’el mare, lo, i tchait su’ch’Dératè qui s’démazingue à mitan. Ch’Dératè, contréremint à sin surpitchet, i n’court point habile, li, ch’est ch’keup d’cotron simpiternel qu’il o.

« Ej’sus rcan qu’i dit, j’ai des crankes, je sus mie gramint ferlus…

- Il est blanc conme du lait prins », qu’alle dit s’fonme, eine sœur à Abel Quéquette chti qui o eu vint-quate éfants. 

Tertous déchindent ech’talus. Ch’quatekmin il est noér d’mon-ne. Meinme chés ferlapeux i z’ont désertè ch’zing ed’mon Victor pour erbayer l’batalle formidabe. Eul’ mélée, ch’est ein-ne dravie du djabe. Ch’Maire i s’étoke coére que s’bave alle o passè par ch’treu du diminche. Le vlo bleuze, acagnardi au pied d’chés marches del plache. Peindaint ch’temps-lo, ch’Chapitain-ne il o martché ch’but dains ch’mur à Maréchal. Ch’est un triomphe dains ch’camp d’chés honmes. Chés joènes i crachent’té à terre dains ch’l’affront qui z’ont rchu. Ch’géraint d’ech’Famiriltère i offe des boutelles éd’frênette à chés chouleux. Chés canettes a z’esplosent sitout qu’o z’ouvre. Ch’est ein-ne douche chucrée qui tchait su chés geins. Zabète, el’maîtréche de ch’l’Harleux d’Barleux, ch’bouchi qui vind des bistèkes tillaches pis du porc-haché qui o ein sintimint d’muternè, alle berdélle qu’sin caracou pis s’bielle robe à fleurs i z’ont rchu eine rude rasade ed’chide ed frin-ne.

A l’choule ed’Ravni, o attind tertous et toudis ch’l’intervinchion d’éch’Cabite à rssorts. Ch’tli-lo, ed’sin vrai nom Dudule Mouque-à-mié, i o perdeu ein-gambe su’ch’Kemin des Dames. Chés docteurs éd’l’armée i l’ont arnatché d’ein-ne patte-ed-fer à rssorts. Ch’l’atrintchillage i fontsion-ne bien tan que ch’Cabite i marche normalemint, tant qui n’s’énérve point, tant qui n’se démein-ne point conme ein fouillak. Tant qu’il est réceint…Mais, aussitout qui vut s’dégourdir ou courir conme quant il avouait coére ses deux gambes, vlo ch’mécanisse djabolique qui s’dézingue et qui foait d’nou cabite ein véritab’ kangourou infnouillé qui seute à droéte pis à geuche conme ein djabe qui sort de s’boéte !

Maugré s’patte folle, ch’Cabite il est matché d’éch’jus d’choule, conme avint li sin pére pis sin taïon. Veu que s’fonme alle s’est érallée avuk ein matchignon ed’Gournay in Bray peindaint s’convalecheinche à l’hôpital ed’Mondidji, ch’Cabite à rssorts il est dains ch’camp d’chés céribataires. Chés joénes i comptent sur li passe que s’patte éd’fer alle peut l’foaire seuter tout partout mais sains qu’éch’peuve affulé i controle ses cumérios pis ses calipétes.

« Ch’Cabite ! Ch’Cabite ! Ch’Cabite ! » qui zhurlent’té chés joénes d’agaches pis ch’z’éfants, pis coére Franchouése el’tchotte naine, pis Gleude ech’pied-bot, pis Djeule-in-biais, ch’mahon avuk sin bec éd’yeuve, pis coére Miché, ch’paralytique, rinfiqué dains sin cadou à roulettes qui fouait inrager chés geins d’Méry-la-Batalle à chés tournoés d’longue peume quaink il djeule d’zinjures malhonnétes à chés joueux qui n’sont point d’Ravni.

« T’os bien tombé d’éte un infirme ! qui disent’t quéques supporteux éd’Maingnelay o d’Montgerain, passe qu’o t’aroéche clatchi t’guife su ch’pavé !

- Quoéqu’o avez après un peufe martyr ? qui grongne un Mouna toudis varonnant à l’intour d’éch’ cadou.

- O n’vo point vo l’arringer coére puss vou avorton, mais i devréche fremer s’gamelle un tchot peu !

- Et pis ti, eh ! makeu d’bren, tu vos l’fremer t’djeule ! »

 Ein-ne belle tamponnèe s’in suivoait su’ch’bord d’él plache, à keups d’boutelles, à keups d’cachoére pis à keups d’cayelles.

Vlo ch’Cabite qui s’met à bondir pis à débondir d’plus en plus heut. Hop ! Il attrape ch’choulet et vlo à passer pis à rapasser dvant l’boutitche d’éch bourlii. Ez’zeutes i z’ont du mo à l’suire.

« Ch’Cabite ! Hé, ch’Cabite ! Pache ! Pache à mi ! » qui crie ch’tchot Maqutinbren.

Peindaint qu’Maqutinbren, ech’fiu d’éch’mercant d’carbon, i rmonte el rue, chés joénes i z’attrapent ech’Cabite par ses gambes pis ils portent, in boustchulant chés zhonmes mériés dusqu’àl’forge d’éch maricho. Maqutinbren y passe ch’choulet à ch’Bâtard qui passe à Carafon, qui passe à ch’Cabite qui seute conme ein-ne madjette, qui perd ch’choulet, oh lala lalalala ! qui l’rattape, qui seute coére pis qui marque su ch’mur à Van Der. (Guy ! Guy ! On vient d’me péter mes lun-nettes, je n’intinds plus rien !)

Chés joénes garchons, chés joénes files i z’égaziotent ed’plaisir. Ch’Cabite il est fin fiér éd’li pis d’es’patte à rssorts.Chés fonmes mériés, émotionnées par euch’pestake a r’bayent ch’Cabite biel honme maugré s’n’imputachion.

« A n’pus qu’maintchi, qu’alle dit Philomèn-ne Belles-gougoutes, ch’est seulmint s’gambe qu’o i o keupé, ch’est mie ch’pus grave ! I resse ch’pus bieu mourcieu ! »

Marie-Régina a n’est mie l’moins inthousiasse veu qu’sin Malin d’Bulles i n’est djère pus d’troup vétillant dains ch’lit nut’tial.

Je n’vos point vo dire quitch’est qu’o gaingné l’choule dé ch’diminche-lo. Ein-ne choule qui o durè dusqu’àprès ch’l’heure de r’chiner, pis ch’l’heure ed’raffourer chés bétes, pis coére ch’l’heure ed’souper. L’choule-lo, alle s’est finite per nuit.

J’vos dirai seulmint qu’à mon Victor, rue d’l’Eglise, pis mon Olympe, ch’café-épicerie d’el rue des Normands coére applée rue d’Montigny, pis mon Florent, dains s’reuelle, ch’l’estaminet d’éch’carrrtchiis, pis mon Godissiabois, dit La Godasse, ouéche qui o achteure l’salle poryvaleinte, y o du chide, del’biére, du van Postillon troés-zéteules, du jniève, del’bistouille, des rinchettes, des surrinchettes pis des ratarinchettes.

Passe qu’à ch’moumeint-lo, i avouait des buveux, des chucheux, des chuchonneux, des lapeux, des ferlapiers, des boés-sin-soé qui lapouaient conme des Polonés, conme des bourriques, conme des coéchons, conme des vieux, conme des vakes, conme des treus, conme des son-neux, conme des rots impoésonnès.

Ch’étouaient des honmes qu’leu mére alle avouait sevré avuk des soréts.

Adon, au soér, ech’bieu soér d’ernouvieu, tertous, ch’Berdleux, ch’Malapate, Carafon, ch’Cabite, Maqutinbren, tertous, ech’Tchurè avu s’soutan-ne verde i z’avouaient tertous keud à leus érelles et minme Ma Sœur Casimir, ech’Dragon, el’piqueuse qui déchinouait des chibes au bleu d’Métylein-ne su chés fesses ed’chés malades pour juer aux fléquettes avuk ses sringues.

Des ferlapeux, o n’o minme ertreuvé dains chés abes !

« Rien qu’à t’vir, min tchou, t’os ch’keup, ti, qu’a y o dit s’mère à ch’Cadoreu, teu n’os point chuché d’él glace ! Tu vos l’vir pis teu vos l’intinde tin pére !

- O voé bien quank o n’o bu, mais o n’voét point quank o n’o soé ! » qu’i o répondu sin fiu en s’y rprénaint à dix foés. 

El nuit-lo, Marie-Régina a o révé à ch’bieu Cabite à rssorts. I dainchouaient tous les deux ein seutant conme des cabrettes au raleinti, à l’fête à Ravni, sul l’plache déch’Graind Bail, ch’duzienme dimainche ed’septin-me et minme equ’tous chés fonmes a n’étoaient jalouses

Mais cho, conme diroait l’eute, ch’est ein-ne eute histoère…

Michel Debray